1973ರಲ್ಲಿ ಆರಂಭವಾದ ‘ಕನ್ನಡ ಭಾರತಿ’ ಕುವೆಂಪು ವಿಶ್ವವಿದ್ಯಾಲಯದ ಮೊಟ್ಟ ಮೊದಲ ವಿಭಾಗವಾಗಿದ್ದು ‘ಕನ್ನಡ ಭಾರತಿ’ ಎಂಬ ಹೆಸರಿನ ಏಕೈಕ ಅಧ್ಯಯನ ಸಂಸ್ಥೆಯಾಗಿದೆ. ಈವರೆಗೆ 270 ವಿಚಾರ ಸಂಕಿರಣ ಮತ್ತು 25 ಜನಪದ ಕಲಾ ಮೇಳಗಳನ್ನು ನಡೆಸಿದೆ. ಯು.ಜಿ.ಸಿ ನೆರವಿನಿಂದ 4 ಪುನರ್‍ಮನನ ಶಿಬಿರ ನಡೆಸಲಾಗಿದೆ. 67 ಗ್ರಂಥಗಳನ್ನು ಪ್ರಕಟಿಸಿದೆ. ಕೈಲಾಸಂ ಬಯಲು ರಂಗಮಂದಿರ ನಿರ್ಮಿಸಿದೆ. ‘ಕನ್ನಡ ಭಾರತಿ’ಯಲ್ಲಿರುವ 04 ಜನ ಪ್ರಾಧ್ಯಾಪಕರು ಡಾಕ್ಟರೇಟ್ ಪದವಿ ಹೊಂದಿದ್ದು, ಬೋಧನೆ, ಸಂಶೋಧನೆ, ಬರವಣಿಗೆ ಮತ್ತು ವಿಸ್ತರಣಾ ಕಾರ್ಯಚಟುವಟಿಕೆಗಳಲ್ಲಿ ನಿರತರಾಗಿದ್ದಾರೆ. ಕೃತಿಗಳನ್ನು ಮತ್ತು ಸಂಶೋಧನಾ ಲೇಖನಗಳನ್ನು ಪ್ರಕಟಿಸಿದ್ದಾರೆ. ಈ ಅಧ್ಯಯನ ಸಂಸ್ಥೆಯಲ್ಲಿ 197 ಸಂಶೋಧನಾರ್ಥಿಗಳು ಪಿಎಚ್.ಡಿ. ಪದವಿ, 48 ವಿದ್ಯಾರ್ಥಿಗಳು ಎಂ.ಫಿಲ್ ಪದವಿ ಪಡೆದಿದ್ದಾರೆ. ಅಂತರ್‍ರಾಷ್ಟ್ರೀಯ, ರಾಷ್ಟ್ರ ಹಾಗೂ ರಾಜ್ಯಮಟ್ಟದ ವಿಚಾರ ಸಂಕಿರಣಗಳಲ್ಲಿ ಪ್ರಬಂಧ ಮಂಡಿಸಿದ್ದಾರೆ. ಸಂಶೋಧನಾ ಯೋಜನೆಗಳನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ. ರಾಷ್ಟ್ರ ಹಾಗೂ ರಾಜ್ಯಮಟ್ಟದ ಸಂಘ ಸಂಸ್ಥೆಗಳ ಸದಸ್ಯತ್ವದ ಗೌರವಕ್ಕೂ ಮತ್ತು ಕರ್ನಾಟಕ ರಾಜ್ಯೋತ್ಸವ ಮತ್ತು ರಾಷ್ಟ್ರ, ರಾಜ್ಯಮಟ್ಟದ ಪ್ರಶಸ್ತಿಗಳಿಗೂ ಪಾತ್ರರಾಗಿದ್ದಾರೆ. ವಿಶ್ವವಿದ್ಯಾಲಯದ ಆಡಳಿತಾತ್ಮಕ ಜವಾಬ್ದಾರಿಗಳಲ್ಲೂ ಭಾಗಿಯಾಗಿ ಅದರ ಪುರೋಭಿವೃದ್ಧಿಗೆ ಕಾರಣರಾಗಿದ್ದಾರೆ.

"ಜಾನಪದ ವಸ್ತುಸಂಗ್ರಹಾಲಯ"ವಿದೆ. ವಿಶ್ವವಿದ್ಯಾಲಯ ಮತ್ತು ಕೇಂದ್ರ ಸರ್ಕಾರದ ಅನುದಾನದಡಿಯಲ್ಲಿ ರೂಪಿತವಾಗಿರುವ ಇನ್‍ಫೋಸಿಸ್ ಫೌಂಡೇಷನ್‍ನಿಂದ 5 ಲಕ್ಷ ವಂತಿಗೆ ಪಡೆದು ಕನ್ನಡ ಕಂಪ್ಯೂಟರ್ ಕೇಂದ್ರ ಆರಂಭಿಸಿ ಗ್ರಾಮೀಣ ಸಮುದಾಯದ ಆಸಕ್ತರಿಗೆ ತರಬೇತಿ ನೀಡಲಾಗುತ್ತಿದೆ. ‘ಕನ್ನಡ ಭಾರತಿ’ ಯಲ್ಲಿನ ‘ಸಾಹಿತ್ಯ ಸಂಘ’ ಮತ್ತು ‘ಜನಪದ ಕಲಾಕೂಟ’ದ ವತಿಯಿಂದ 47 ವರ್ಷಗಳಿಂದಲೂ ವಿಭಿನ್ನ ಕಾರ್ಯಕ್ರಮಗಳನ್ನು ನಡೆಸುತ್ತಾ ಬರಲಾಗಿದೆ. ವಿಭಾಗದ ಗ್ರಂಥಾಲಯಕ್ಕೆ ಪ್ರಖ್ಯಾತ ಸಾಹಿತಿಗಳಿಂದ ಈವರೆಗೆ 3 ಸಾವಿರ ಗ್ರಂಥಗಳನ್ನು ಕೊಡುಗೆಯಾಗಿ ಪಡೆಯಲಾಗಿದೆ. ಯು.ಜಿ.ಸಿ. (ಸ್ಯಾಪ್) ಯೋಜನೆಯಡಿ ‘ಆಧುನಿಕ ಕನ್ನಡ ಸಾಹಿತ್ಯ ವಿಮರ್ಶೆ’ ಎಂಬ ವಿಷಯಕ್ಕೆ 2004-06 ಕಾಲಾವಧಿಗೆ 38 ಲಕ್ಷ ಆರ್ಥಿಕ ನೆರವು ದೊರೆತಿದ್ದು, ಯೋಜನೆ ಪೂರೈಸಿದೆ. ಕರ್ನಾಟಕ ಸರ್ಕಾರವು ‘ಕನ್ನಡ ಭಾಷಾಭಿವೃದ್ಧಿಯೋಜನೆ’ಯ ಅಡಿಯಲ್ಲಿ ಒಂದು ಕೋಟಿ ರೂಪಾಯಿಗಳ ಅನುದಾನ ನೀಡಿದ್ದು, ಕುವೆಂಪು ಅವರ ಸಮಗ್ರ ಸಾಹಿತ್ಯವನ್ನು ಕುರಿತ ಎಂಟು ಸಂಪುಟ ಪದವಿವರಣಾ ಕೋಶಗಳನ್ನು ಪ್ರಕಟಿಸಲಾಗಿದೆ. 2017-18ನೇ ಸಾಲಿನಿಂದ ತಿಂಗಳ ಚಿಂತನ-ಮಂಥನ ಕಾರ್ಯಕ್ರಮ ಆರಂಭಿಸಲಾಗಿದೆ.